Skirbi · 21 yan 2018
Algu ku un smartwatch nunka lo tin: patina
Desgaste dor di mano di tempu
Un bon amigu di mi tabatin un problema ku su Apple Watch: e digital crown a pèrdè un anel di goma i pa motibu di esei e relòshi a pèrdè su resistensia na awa. Apple no a hasi problema di dje i a ofresé pa reemplasá su "aparato". Maske e a resolvé su problema, esaki a sinti pisá pa orea di un amante di relòshi manera mi. E a hasi mi komprondé e úniko kos ku un smartwatch nunka lo tin: patina.
Kiko ta patina i dikon e ta importante?
Señal di desgaste ku ta bini di dékadas di uso diario, esei ta loke aficionado ta yama patina. Maske e ta parse kontradiktorio, patina riba relòshi ta algu ku ta wòrdu konsiderá deseabel.
Kolekshonistanan ta stima e fakto ku ta tuma tempu pa un relòshi bira manera e ta mira awe. Inkontabel raspu minúskulo i kikanan okasional ta konta e storia di doñonan anterior. Hende por hasta imaginá ku e ta erdá algu di e machismo di esnan ku a bisti dje promé.
Ora bo ta bisti un relòshi bo ta - literal - konektá ku dje. E señalnan visibel di e konekshon aki ta loke ta hasi patina personal i úniko. Ora un relòshi bieu ta wòrdu renobá ku un kara nobo, ku wizernan of otro parti importante reemplasá, e ta pèrdè su enkanto (i balor) mesora.
Smartwatch i patina
Manera hopi elektrónika di konsumidó moderno, un smartwatch ta útil solamente pa un tempu limitá, pasobra den un aña e ta wòrdu reemplasá pa un modelo mihó, mas lihé i mas nobo. Maske e lo kontinuá funshoná pa un tempu, e lo daña of bira obsoleto pa falta di aktualisashon di software den futuro. E smartwatch lo djis no bira bieu basta pa desaroyá un patina ku di bèrdat meresé e nòmber.
Tesoro di famia
Patina por tin un balor inkreíbel, maske e relòshi no ta karu. Mi ta konsiderá mi mes felis pa tin e tres relòshinan aki:
Mi dos welo i mi tata, tur ku a bandoná nos kaba, a bisti e relòshinan aki. Nan relòshinan tur tin un patina ku ta úniko pa nan. Raspu, skòrtá i hundimentu ku a akumulá miéntras nan tabata riba nan pols. E señalnan aki di tempu ta hasi e relòshinan aki balor hopi mas pa mi ku nan balor monetario.
Konklushon
Ora bo kompará smartwatch ku relòshi normal, no lubidá patina. Un relòshi regular por dura henter un bida sin problema i desaroyá un patina ku ta kuadra pa mustra esei.
E Apple Watch di mi amigu a wòrdu tratá komo un "aparato" anónimo ora e a wòrdu reemplasá pa motibu di e sello di goma floho den e digital crown. Imaginá bo kon mi lo reakshoná si mi hasidó di relòshi lo "repará" e relòshi di mi tata dor di reemplas'e! Mi lo bira hopi rabiá!
Maske awe bo no ta duna balor na patina, esaki por ta diferente pa e próksimo generashon. Mi ta kurioso kon e generashon di futuro lo mira patrá riba e kosnan ku nos ta balorá i bisti awe. Mi ta pensa ku solamente tempu lo bisa... :-)
