Kombatí backscatter spam na nivel di server

E problema

E server ta un mailserver Postfix riba Debian GNU/Linux ku tur e último update i patch di siguridat. Kliente legítimo ta usa e server, i nan por usa dje so ku outentikashon debí.

Evitá di bira un open relay

Outentikashon individual di usuario riba un mail server ta un medida importante kontra abusu di e mail server. Si ta manda spam, bo por mira kua usuario ta kousa e problema dor di mira e log di e mail server. Den término téknico esaki ta nifiká ku bo ta evitá ku e server bira 'un open relay'. Postfix ta ofresé hopi konfigurashon pa limitá SMTP relay ku kontrol di akseso.

Limitá e tasa di kuenta di mail (hackeá)

Abusu di server pa usuario individual ta pasa ora nan kompiuter ta haña un virus of ora nan password ta wòrdu intersepta. Esei por pasa ora bo ta bai riba bo mail via un WiFi insigur sin enkriptashon (TLS/SSL). Pa situashon manera esaki ta un bon idea pa limitá kuantu email ku usuario individual ta pèrmití di manda. Bo por usa parámetronan di konfigurashon di Postfix individual (manera smtpd_client_message_rate_limit, smtpd_client_connection_rate_limit i smtpd_client_recipient_rate_limit) of usa un firewall di Postfix manera Postwfd.

E server ta kai riba e lista pretu di 'backscatterer.org'

Maske ku tur medida kontra abusu di spam, e server a wòrdu pone riba http://backscatter.org pa manda spam. Si un server ta kai riba un lista pretu, otro server no ta konfia dje mas i ta konsiderá tur mensahe komo dudoso. Esaki por hasi ku otro server mira bo mensahe (legítimo) komo spam (falsu positivo). Pa komprendé kon esaki a pasa, promé bo mester komprendé kiko backscatter spam ta.

Kiko ta backscatter spam?

Backscatter spam ta mensahe automátiko di rebote ku e mail server a manda di manera inkorekto, mayoria di biaha komo efekto sekundario di spam ku ta drenta.

Backscatter ta pasa ora spammer ta falsifiká e adrès di remitente. Nan ta manda un mensahe ku nan ta spera ta rebotá, ku e adrès di un otro hende komo remitente. Ora e mensahe ta rebotá, e mail server ta debolbe e mensahe na e remitente falsifiká... i asina e server ta entregá spam pa bèrdat na e adrès di e remitente.

E senario simpel di backscatter ta ora un mensahe ta wòrdu rebotá na e remitente ekivoká. Ta un senario ku ta fásil pa resolvé dor di konfigurá e server pa no manda mensahe di rebote, ma pa kontestá ku un kódigo di error SMTP.

Ta lamentabel ku tin un otro senario (mas difísil) ku ta hasi bo mail server manda backscatter spam. Esaki ta pasa ora algun hende riba bo server konfigurá su kuenta di mail pa reenvia email na un otro adrès. E di dos server por tin un filter di spam mas strikto ku ta blòk mensahe ora nan ta wòrdu reenvia. Bo mail server lo informá e remitente original ku e reenvio a fayá, i asina ta kousa backscatter spam.

E senario di reenvio ta hopi mas difísil pa resolvé pasobra posibel ku bo no ta kontrolá e otro mail server of su konfigurashon di filter di spam. Loke ta peor, ta ku hopi bes tin un demora entre aksepta e mensahe i reenvia e, ku ta hasi imposibel pa warda pa un kontesta di e otro mail server.

Evitá backscatter spam

E úniko manera pa evitá backscatter spam ditur ta pa ta hopi strikto na e promé mail server, na e fase inisial di konekshon SMTP. Esaki ta resolvé e senario difísil di 'reenvio' dor di ta hopi selektivo tokante kua mensahe ta wòrdu reenvia.

Kon pa blòk spam promé ku e drenta e server

E mihó manera pa evitá backscatter spam ta pa blòk e promé ku e drenta e (kadena di) server(nan).

Di tradishon server ta usa filter di spam avansá manera SpamAssasin pa analisá mensahe un pa un. Esaki ta kousa karga adishonal riba e mail server.

Lo ta hopi mas fásil pa mira e remitente (p.e. si e tin un sombré kòrá) pa filtrashon inisial. E remitente ta riba un lista pretu? E ta usa un app di mail 'normal', of ta un virus of malware ta manda e mensahe? Bo por determiná hopi kos dor di wak riba e 'idioma' ku e remitente ta papia.

Den Postfix bo por spesifiká restrikshon di SMTP den e file di konfigurashon main.cf. Tin kontrol ku por wòrdu usa pa blòk mensahe. Ta un bon idea pa traha di 'fásil pa difísil' den e lógika di filter, ku ta kuminsá ku kosnan ku por wòrdu kontrolá sin konsultá server eksterno. Esaki ta redusí tráfiko di red i karga. So si un mensahe ta pasa tur kontrol, e ta wòrdu permití pa entrega (of reenvio).

Ta ora di entrega bo por implementá filtrashon di spam adishonal komplekso (i spesífiko pa usuario) ku herment manera SpamAssasin of Bayes filtering. Ora bo ta redusí e influho di mensahe spam obvio, e filternan aki ku ta usa hopi rekurso por traha nan trabou hopi mas efisiente.

Konklushon

Kombatí spam na nivel di server ta un wega difísil, pasobra spammer ta bira mas kreativo den abusá mekanismo di mail server. Si bo server ta kai riba un lista pretu pa backscatter spam, bo mester tene kuidou ku senario di reenvio. Tene wak riba lista pretu pa mira si bo server ta kousa problema.

Blòk mensahe ku kódigo di error na lugá di debolbe nan na e remitente (rebotá). Konfigurá e server ku un polítika di entrega strikto. E mihó manera pa evitá backscatter spam ta pa blòk mensahe promé ku nan drenta e mail server, awor bo sa kon.