It nocht fan in ienfâldige laptop

Surface Laptop Go

As ûnderdiel fan de populêre Surface-rige yntrodusearre Microsoft de Surface Laptop Go. It is in lytse, ienfâldige laptop sûnder in bepaalde funksje dy't der útspringt. Op papier sil de spesifikaasjelist dy wierskynlik net ûnder de yndruk bringe. Mar dat is eins in goed ding.

It ding mei moderne hardware is dat minsken tefolle sykje nei moaie funksjes. Dingen om mei op te skeppen, dingen om te toanen. “Ik bin better as do” en “sjoch ris wat ik kin?!” Flaggeskipapparaten, ek smartphones, wurde yntrodusearre as rockstjerren op grutte poadia. Mar de kâns is grut dat do gjin groupie en gjin fanboy bist.

Lykas libje mei in rockstjer wierskynlik net sûnder praktyske swierrichheden is, hawwe ultra-heechweardige apparaten faak ferburgen mankeminten. Se kinne te waarm wurde, ûnfoarsisber reagearje of in heech priiskaartsje freegje foar har oanwêzigens. As do op syk bist nei in deistige maat, hast dan miskien leaver wat minder “rockstjerkarakter”. De Surface Laptop Go is dan miskien krekt wat do nedich hast!

As do de laptop yn de hannen hast, krijst daliks in gefoel fan hoe goed er yn inoar sit. Hy is stevich en solide, mar sûnder oermjittich gewicht. It is in hiel moaie balâns dy't dy it fertrouwen jout om him oeral mei hinne te nimmen.

Oars as de kompjûters fan tûzenen euro’s is de relatyf betelbere priis fan de Surface Laptop Go (fan € 629 ôf) net daliks reden foar in twadde hypoteek. Dat makket alles makliker, want do fielst dy mear op dyn gemak om him te brûken: it is ark, gjin kostber sieraad!

Yn gebrûk

Ik haw de Surface Laptop Go mei Windows 10 brûkt as alternatyf foar myn leafste lytse tablet dy’t frije software draait. Ik besykje geregeld ferskillende apparaten en bestjoeringssystemen om in aktueel begryp te hâlden fan “de oare kant fan it hek”. Dat jildt foar myn kompjûters, mar it jildt ek foar myn smartphone. Do moatst dysels nea beheine ta ien bepaald platfoarm, it is echt nuttich om in iepen geast te hâlden foar de ferskillende opsjes dy’t der binne. Myn heit sei altyd: “Lês oeral de menukaart, mar genietsje fan it thús kokke miel!”

Myn deistige routine bestiet út fan alles: e-mail ôfhannelje, artikels lêze, blogberjochten skriuwe, programmearje, serverbehear en it sa no en dan hackjen. Ik wurkje thús en op myn kantoar yn Amsterdam, wêrfoar’t ik in fyts brûk om hinne en wer te gean. Foar praktyske doelen fyn ik it moai as myn kompjûters draachber binne, leafst sa dat se yn myn waarbestindige rêchsek passe.

Skerpe eagen ûnder jim hawwe miskien de foto's fan it skerm fan Windows 10 yn de foarige blogberjochten opmurken, oer wat rsync-magy en wat programmearwurk. Om mei Windows 10 op te skieten wie wat knoeierij nedich. De Surface Laptop Go komt mei Windows 10 yn S-modus. Oh, jonge.

Windows 10 yn de saneamde “S-modus” draaie betsjut dat it op slot sit. Net iens de eigen apps fan Microsoft wurkje goed, lykas ik belibbe doe’t ik de Windows Terminal besocht te brûken:

It wichtichste foardiel fan Windows 10 S-modus is dat do better beskerme bist tsjin bedrigingen en malware. Ik begryp it wol, it is krekt as dat do dyn auto net ta wrak ride kinst as er net rydt. Út de S-modus stappe kin, mar do kinst nea werom... nea! As waard do út it nêst ferbannen, it S-nêst.

Op ien of oare manier fielt dit in bytsje frjemd, ik kin allinnich hoopje dat Microsoft in bettere manier fynt om in feilige Windows-ûnderfining te bieden yn plak fan dit “doch it of doar it”-ultimatum. Mar eare wa’t eare takomt: as do de S-modus ienkear ferlitten hast, is hast alles mooglik mei Windows hjoed de dei!

As do de tiid nimst om Windows 10 yn te stellen, is it in tige kapabel bestjoeringssysteem. Ik fûn myn wei fluch doe’t ik oan it wurk gie. Windows 10 is goed op in foarsisbere, profesjonele manier.

De Surface Laptop Go makke my wer bewust fan it ienfâldige nocht fan in laptop as ark. It wurket gewoan. Iepenmeitsje, wat wurk dwaan, ticht dwaan en wer fan foaren ôf oan. Microsoft hat de Windows 10-ûnderfining op Surface perfekt útwurke, software en hardware binne moai yntegrearre (op in manier dy’t my oan Apple op syn bêst docht tinke).

In moai foarbyld fan de ferfine aard fan de ûnderfining is de fingerôfdruksensor. De kompjûter start yn in ûnleauwige fluggens op en wachtet op dyn oanrekking om him te ûntskoattelen. In subtile mar dúdlik sichtbere oanwizing wurdt jûn: de oan/út-knop ljochtet op. Raak him oan en “et voilà”, do bist ree om te gean.

Wurkje mei de laptop is in nocht. Hy wurket yn koele stilte, wêrtroch’t do dy folslein op dyn wurk konsintrearje kinst. De tinne rânen om it skerm jouwe dyn wurk alle romte. Se meitsje de wurkromte foar dyn kreativiteit sa grut mooglik, wylst it draachbere formaat bewarre bliuwt.

It toetseboerd fan dizze laptop is fantastysk, de toetsen fiele ekstreem noflik. Lit dy net ferrifelje troch it plestik uterlik, der is neat swak oan dit toetseboerd. De toetsen binne omjûn troch aluminium, wat in noflik gefoel jout as do dyn hannen neist de trackpad lizze litst.

De romme trackpad is in oar foarbyld fan it yntegrearjen fan hardware en software. Microsoft hat stipe foar multi touch-gebearten tafoege oan Windows 10. Dat is in waarm wolkom foar dyjingen fan ús dy’t dêr al safolle jierren fan genietsje op Apple macOS.

Konklúzje

De Surface Laptop Go falt op om de goede reden: it is in perfekte deistige maat. Hoewol’t der goedkeapere alternativen fan oare fabrikanten binne, kin ik net oars as fiele dat gjinien fan har itselde nivo fan yntegraasje fan hardware en software biedt. Dizze ferfining makket it ferskil, elke sint wurdich.

Wurkje mei Windows 10 is net sa min, dat is hege lof fan immen lykas my dy’t graach in eigen bestjoeringssysteem bout. Wurkje mei ferskillende systemen wiist my der wer op om in iepen geast te hâlden, der binne goede dingen bûten myn gewoane gewoanten!