Algun pensamentu tokante desèño di interface pa touch screen

E herensia di mouse i teklado

Interface di aplikashon tradishonal pa PC a ser desèñá i desaroyá mas ku nada ku aparato di input distinto na mente, manera teklado i mouse. Hopi konvenshon, mihó práktika i patrón di desèño tin nan rais den e pasado ei. Esei ta bon ora bo ta desèñá un app pa PC tradishonal, pero kasi sigur bo públiko meta ta usa aparato moderno ku touch screen awendia. Lo ta un eror pa kopia e UI bieu riba aparato moderno ku touch screen!

Rekreá patrón di UI bieu riba un aparato moderno ku touch screen no ta bai gana bo ningun premio di usabilidat... (maske ken no ta sinti falta di Clippy?)

Interakshon natural

Aparato moderno ku touch screen ta hasi interakshon mas natural, pasobra nan ta eliminá e mester di aparato di input manera mouse. E aparato ta e boton di input: bo por manipulá elemento riba pantaya fásil i direkto, ku toke i gesto.

Manipulá elemento riba pantaya direkto ta sinti natural - un mouse lo ta redundante den e kaso aki

Limpia e pantaya i duna e elementonan e grandura korekto

Un dede ta hopi mas grandi ku un kursor di mouse ku ta punta, i esaki ta pidi un manera diferente di determiná e grandura di elementonan di interface. Elemento interaktivo mester ta sufisiente grandi pa por toké nan, ku hopi espasio entre nan. Meta ku ta muchu serka di otro ta hasi e chèns di eror mas grandi.

E botonnan grandi di 'sí/no' ta redusí e chèns di eror, pasobra nan no ta mester e presishon di pixel di un kursor di mouse

Optimisá input di teksto

Dependé di loke bo ta traha, ta probabel ku bo lo mester algun tipo di input di teksto òf número na algun momentu. E manera fásil (i robes) ta pa djis mustra un teklado virtual kompletu. En lugá di traha un rekreashon virtual di e pasado (e teklado físiko), bo mester aprobechá e oportunidat pa pensa di nobo kiko bo ta puntra e usuario. Dependé di e kontekstu di input bo lo mustra un teklado mínimo ku ta ofresé djis e teklanan relevante.

Teklado kontekstual ta ofresé un mihó manera pa input di teksto. No tin sentido pa mustra un teklado QWERTY kompletu si bo ta puntra djis pa un número

Pensa di nobo riba posishon

Tin biaha aplikashon tradishonal pa PC tin nan barra di herment na tope di e bentananan, i si bo kopia esei riba un aparato ku touch screen, e manonan lo tapa e resto di e pantaya. Banda di mantené e kontenido di e pantaya visibel, bo mester konsiderá tambe e ergonomia di e manera ku bo ta tene e aparato. Boton ku ta ser usá hopi biaha mester ta di preferensia serka di e posishon natural di e dedenan.

E botonnan Bèk / Skonde / Warda ta serka di e polgar: nan ta den alkanse i alkansá nan no ta tapa e kontenido di e pantaya

Lubidá hover i tooltip

Lubidá elemento di interface, manera estruktura di nabegashon, ku ta depend di hover (pasa e dede riba dje sin toké). Mayoria di touch screen no ta registrá dede ku ta flotá riba e glas. Bo tampoko no por konta riba tooltip pa splika funshon di bo interface. Un UI di touch screen mester ta kla pa e usuario na promé wak.

Estruktura di nabegashon ku ta depend di hover NO ta bai funshoná riba touch screen

Ta kreativo

Desèñá pa interakshon di toke ta algu ku bo mester - promé ku tur kos - tuma manera algo kreativo. En lugá di rekreá loke ta bieu, bo mester pensa riba tur e posibilidatnan ku loke ta nobo ta ofresé.

Snake '97 - E ta dibertí, pero por ser bisá ku su desèño di UI ta malu

Ora mi a krea e wega Snake 97 pa aparato ku touch screen, mi a rekreá e mekanismo di input bieu ku masha atenshon pa detaye. Mi ta haña esei dibertí, pero por ser bisá ku e ta un mal desèño di UI, pasobra e ta ignorá tur e posibilidatnan ku e teknologia nobo ta ofresé. No ta sorpresa ku wega manera Angry Birds ta tin tantu éksito, pasobra nan ta hasi uso total di e interakshon natural ku toke ta hasi posibel.

Katapultá e “birds” ta dibertí pa via di e interakshon natural ku ta e klave di e wega Angry Birds

Konklushon

Un profesor influensial un biaha a puntra mi: “Pero e ta dibertí, Willem?”. Ora bo ta desèñá pa toke, bo mester konsiderá e pregunta aki di bèrdat. Si bo kontestá ku “SÍ!”, bo por konsiderá bo mes riba e bon kaminda.

Bo mester reimaginá interakshon en lugá di rekreá kosnan bieu. Klaru, no tur kos bieu ta malu; pero lo ta un eror pa ignorá e bon potensial ku teknologia moderno ta hasi posibel!