Skriuwen · 21 aug 2018
Romtereizen fan El Teide ôf
Op besite by de fulkaan fan Tenerife op de Kanaryske Eilannen
Myn simmerfakânsje brocht my nei Tenerife, ûnderdiel fan de Kanaryske Eilannen, Spanje. It is in populêre bestimming fanwegen it klimaat, mar it is ek it thús fan de Teide, de op ien nei heechste fulkaan fan de wrâld (7500 m, mjitten fan de seeboaiem ôf). It ûnbidige útsjoch reitsjet fier boppe de ierde út, yn de romte, de Molkwei en oare fiere stjerrestelsels.
Tenerife
It Kanaryske eilân Tenerife is ynternasjonaal bekend as it "Eilân fan de Ivige Maitiid" (Isla de la Eterna Primavera). Op likernôch deselde breedtegraad as de Sahara hat it in waarm, tropysk klimaat mei in gemiddelde fan sa'n 24 °C. It klimaat wurdt bepaald troch de passaatwinen oer de Atlantyske Oseaan, wêrfan't it focht oer it noardlike diel fan it eilân kondensearret en wolken foarmet. It waar op it eilân is oars yn it noarden as yn it suden fanwegen de enoarme fulkaan yn it midden.
De radarôfbylding lit de fulkaan Teide sjen op it eilân Tenerife yn de Kanaryske eilannen. De ôfbylding is makke mei de Spaceborn Imaging Radar-C/X-Band Synthetic Aperture Radar (SIR-C/X-SAR) oan board fan de spaceshuttle Endavour yn 1994. De kleur jout ferskillen yn it terrein oan, wêrby't skaden fan grien en brún lavastreamen fan ferskillende leeftiden en rûchheden oanjouwe.
El Teide
De fulkaan op it eilân Tenerife, El Teide, is de heechste fan de wrâld nei dy fan de Hawaïaanske Eilannen. Mjitten fan de oseaanboaiem ôf berikt de top (Pico del Teide) 7500 meter. De top leit 3718 meter boppe seenivo. Fanwegen de skiednis fan ferneatigjende útbarstingen wurdt de fulkaan yn de gaten hâlden troch it Komitee foar Rampbestriding fan de Feriene Naasjes. De lêste útbarsting wie yn 1909.
As do goed sjochst, falt op dat de fulkaan ynstoarte liket te wêzen: de top liket nei ûnderen drukt te wêzen en wurdt omjûn troch in "ring" fan berchtoppen. Dit hjit in "kaldera", in grutte ynstoartkûle dy't meastentiids ûntstiet as in grutte útbarsting de magmakeamers yn de fulkaan hielendal leechmakket.
De fulkaan en syn omjouwing foarmje it Nasjonaal Park Teide, in Wrâlderfgoedlokaasje fan UNESCO. De omjouwingsbetingsten en geologyske formaasjes lykje op dy op Mars.
It nasjonaal park Teide is iepen foar it publyk en mei de auto te berikken. Ûnderweis hast prachtich útsjoch.
It lânskip is oars as alles wat ik earder sjoen haw. Fanwegen de oerienkomsten mei Mars wurdt Las Cañadas troch romteagintskippen brûkt om planetêre rovers te testen.
Der binne fjouwer haadwegen nei en fan de kaldera, elk mei oare taferielen. Fan tichte bosken oant bleate rotsen, fan swiere mist oant heldere loften. Do moatst se allegearre ûndersykje!
As it bûtenierdske lânskip net genôch is, dan lit it riden boppe de wolken dy echt beseffe dat dit net dyn gewoane reis nei it wurk is. It kontrast mei de top fan de Teide is geweldich as do ûnder de wolken delkomst. Dêr is it lânskip grien, fol libben en fegetaasje.
As do de kuierrûte fan Masca folgest, dat in gefaarlike kuier is, kinst hielendal del oant seenivo. As do gjin sin hast yn berchsport, kinst dit fenomenale swimplak ek mei de boat berikke, wêrby't do ûnderweis walfisken sjen kinst.
Mar pas op wêr't do yn see springe wolst! Oan de noardkant fan it eilân binne sterke streamingen, tige gefaarlik foar swimmers.
Romte
Fanwegen de goede astronomyske omstannichheden boppe-op de fulkaan wurdt de Teide brûkt om nei de stjerren te sjen. Sûnt 1964 is er it thús fan it Teide Observatorium (Observatorio del Teide). It waard ien fan de earste grutte ynternasjonale observatoria mei teleskopen út ferskillende lannen. It is wol in útsjoch, dizze "teleskoopstrjitte".
Astronomyske observatoria lizze oer it algemien boppe-op bergen, om't de lucht by de grûn meastentiids mear konvektyf is (ûnrêstich troch it temperatuerferskil). Stabile lucht fan heech boppe de wolken en oseanen jout oer it algemien de bêste omstannichheden. It is by Teide ek tige tsjuster yn de nacht, om't it midden yn de oseaan leit (dat de ljochtfersmoarging fan grutte stêden beheint).
Besykje it echt sels: gean yn de nacht nei de Teide. De loft is echt ûnleauwich: ik haw noch nea safolle stjerren sjoen! Do hast gjin teleskoop of spesjale bril nedich, sjoch gewoan mei dyn bleate eagen. De measte stjerren en stjerrestelsels binne te sjen foardat de moanne opkomt. Nim de tiid en do sjochst noch mear detail.
Dizze prachtige foto is makke troch myn frou Ellen mei in profesjonele kamera. It jout hiel goed wer hoe't de loft yn werklikheid is yn de nacht by de Teide, dit is gjin Photoshop! Sjoch hoe't de Molkwei de loft ferljochtet as in subtile wolk. Miljarden stjerren yn ien sicht. Ik haw noch nea wat sa moais sjoen, it is wier prachtich.
Konklúzje
Do hoechst net te wachtsjen oant Elon Musk syn Mars-raket klear is om de romte te sjen. Besykje Tenerife en wurd ferbjustere troch it bûtenierdske útsjoch.
Nei al dyn stjerren sjen en romtereizgjen soest ûntspanne en genietsje fan it sinnige waar by it swimbad. Noflike fakânsje, allegearre!